బీఆర్‌ఎస్‌ను తుడిచిపెట్టేందుకు ప్రధాని నరేంద్ర మోదీ, ముఖ్యమంత్రి రేవంత్‌రెడ్డి కుట్ర పన్నుతున్నారని బీఆర్ఎస్ వర్కింగ్ ప్రెసిడెంట్ కేటీఆర్ ఆదివారం అన
బీఆర్‌ఎస్‌ను తుడిచిపెట్టేందుకు ప్రధాని నరేంద్ర మోదీ, ముఖ్యమంత్రి రేవంత్‌రెడ్డి కుట్ర పన్నుతున్నారని బీఆర్ఎస్ వర్కింగ్ ప్రెసిడెంట్ కేటీఆర్ ఆదివారం అన్నారు. అయితే, మోదీ, రేవంత్‌రెడ్డి అంటే బీఆరెస్ కు భయం లేదని, తెలంగాణ ప్రజల గొంతుకగా పోరాడుతూనే ఉంటుందని మల్కాజిగిరి పార్లమెంట్‌ నియోజకవర్గ బీఆర్ఎస్ నాయకులను ఉద్దేశించి ఆయన అన్నారు.
ఇటీవల రేవంత్ రెడ్డి , ఉప ముఖ్యమంత్రి మల్లు భట్టి విక్రమార్క న్యూఢిల్లీలో మోడీని కలిసినప్పుడు, BRSను అంతం చేయడానికి తాము పూర్తిగా సహకరిస్తామ‌ని చెప్పారని, తెలంగాణలో బీజేపీ, కాంగ్రెస్ ఒక్కటేనని కేటీఆర్ ఆరోపించారు.
అదానీ, మోడీ ఒకటేనని న్యూఢిల్లీలో కాంగ్రెస్ విమర్శిస్తుండగా, దావోస్‌లో రేవంత్ రెడ్డి అదే అదానీతో పెట్టుబడి ఒప్పందం కుదుర్చుకున్నారని కేటీఆర్ మండిపడ్డారు. రాష్ట్రాన్ని బీఆర్ఎస్ పాలించినంత కాలం అదానీని తెలంగాణలో అడుగు పెట్టనివ్వలేదన్నారాయన.
అసెంబ్లీ ఎన్నికల సమయంలో కాంగ్రెస్ నేతలు వాగ్దానం చేసిన వాటినే బిఆర్‌ఎస్ పునరావృతం చేస్తున్నప్పుడు, నిజం మాట్లాడటం, విద్యుత్ బిల్లులు చెల్లించవద్దని ప్రజలను కోరడం విధ్వంసక ఆలోచనగా ఎలా అంటున్నారో వివరించాలని భట్టి విక్రమార్కకు కేటీఆర్ ఘాటుగా కౌంటర్ ఇచ్చారు.
“సత్యం మాట్లాడటం ఎప్పటి నుండి విధ్వంసక ఆలోచనగా మారింది? సోనియా గాంధీ 200 యూనిట్ల వరకు విద్యుత్ బిల్లులు చెల్లిస్తారని కాంగ్రెస్ నేతలు చెప్పారు. మనమందరం సోనియా గాంధీకి కరెంటు బిల్లులు పంపుదాం. BRS ఎమ్మెల్యేలు, నాయకులు ఆమెకు బిల్లులు పంపేలా ప్రజలను ఒప్పించాలి. కాంగ్రెస్ నేతలు వాగ్దానాల నుంచి తప్పించుకునే ప్రయత్నం చేస్తున్నారు. మనం ఈ విషయాన్ని ప్రజల్లోకి తీసుకెళ్లాలి,” అన్నారాయన.
ఇటీవల జరిగిన అసెంబ్లీ ఎన్నికల్లో పార్టీ ఓటమికి దారితీసిన తప్పులను గుర్తించామని, అవి పునరావృతం కాబోవని కేటీఆర్ హామీ ఇచ్చారు. బీఆర్ఎస్ స్వల్ప ఓట్ల తేడాతో 14 సీట్లు కోల్పోయిందని, ఆ పార్టీ మరో ఏడెనిమిది సీట్లు గెలుచుకుని ఉంటే రాష్ట్రంలో హంగ్ అసెంబ్లీ ఏర్పడి ఉండేదని అన్నారు.
పార్లమెంట్‌లో తెలంగాణ హక్కుల కోసం పోరాడిన చరిత్ర బీఆర్‌ఎస్‌దేనని కేటీఆర్ పునరుద్ఘాటించారు. లోక్‌సభలో తెలంగాణ వాణిని వినిపించేందుకు 17 ఎంపీ స్థానాల్లో 16 స్థానాలను బీఆర్ఎస్ గెలుచుకోవడం అత్యవసరమని, గత ఎన్నికల్లో మల్కాజిగిరి లోక్‌సభ స్థానంలో బీఆర్ఎస్ కొద్ది ఓట్ల తేడాతో ఓడిపోయిందని, పార్టీ నాయకుల కృషితో మల్కాజిగిరి నియోజకవర్గం పరిధిలోని ఏడు అసెంబ్లీ నియోజకవర్గాలను కైవసం చేసుకున్న పార్టీ ఈసారి విజయం సాధిస్తుందని గుర్తు చేశారు.
“కారు సర్వీసింగ్ కోసం మాత్రమే వెళ్ళింది , రెట్టింపు వేగంతో మళ్లీ నడుస్తుంది. మైనారిటీల్లో ఉన్న అపోహలను తొలగించి, పార్టీని అట్టడుగు స్థాయి నుంచి బలోపేతం చేద్దాం, లోక్‌సభ ఎన్నికల్లో పార్టీ విజయానికి కలిసికట్టుగా కృషి చేద్దాం’’ అని కేటీఆర్ అన్నారు