బీసీలకు 42 శాతం రిజర్వేషన్లు అని రాహుల్ గాంధీ చెప్పిండ్రు.మేం చేస్తున్నం:ముఖ్యమంత్రి రేవంత్ రెడ్డి

బీసీలకు 42 శాతం రిజర్వేషన్లు అని రాహుల్ గాంధీ చెప్పిండ్రు.మేం చేస్తున్నం:ముఖ్యమంత్రి రేవంత్ రెడ్డి

కాంగ్రెస్ అధికారంలోకి వస్తే బీసీ రిజర్వేషన్లు 42 శాతానికి పెంచుతామని రాహుల్ గాంధీ ఆనాడు హామీ ఇచ్చారని, మేం బాధ్యతలు చేపట్టగానే 4 ఫిబ్రవరి 2024 లో బీసీ కులగణన ప్రక్రియను మొదలు పెట్టామని, అసెంబ్లీలో ముఖ్యమంత్రి రేవంత్ రెడ్డి తెలిపారు. కులసర్వేలో పాల్గొన్న అందరికీ కృతజ్ఞతలు తెలియజేస్తున్నామని, తెలంగాణ సమాజం బలహీన వర్గాలకు రిజర్వేషన్ల విషయంలో ఏకాభిప్రాయంతో ఉన్నారనే సందేశం ఈ సభ ద్వారా పంపించాలనుకున్నాం ముఖ్యమంత్రి అన్నారు.
బీసీ రిజర్వేషన్లు 37 శాతానికి పెంచాలని గత ప్రభుత్వం గవర్నర్ కు ప్రతిపాదన పంపించిందని, దానిని ఉపసంహరించుకొని బీసీ రిజర్వేషన్లు 42 శాతం పెంచేందుకు, కొత్త ప్రతిపాదన పంపిస్తున్నామన్నారు. 4 ఫిబ్రవరిని సోషల్ జస్టిస్ డే గా సభ ద్వారా తీర్మానం చేశామని, అందరినీ సంప్రదించి బీసీలకు 42 శాతం రిజర్వేషన్లు కల్పించాలనే ఈ బిల్లును తీసుకొచ్చామన్నారు. సభా నాయకుడిగా నేను మాట ఇస్తున్నానని, బీసీ రిజర్వేషన్ల సాధనకు నేను నాయకత్వం వహిస్తా అన్నారు. అఖిలపక్ష నాయకులు అందరం కలిసికట్టుగా వెళ్లి ప్రధానిని కలుద్దామని, బీసీ రిజర్వేషన్లు 42 శాతం పెంచేందుకు అవసరమైన చట్టపరమైన చర్యలు తీసుకుందామన్నారు. ఇందుకోసం ప్రధాని మోదీ గారి అపాయింట్ మెంట్ ఇప్పించే బాధ్యత కేంద్ర మంత్రులు కిషన్ రెడ్డి, బండి సంజయ్, బీజేపీ సభాపక్షనాయకుడిని కోరుతున్నానన్నారు. రాహుల్ గాంధీని కూడా కలిసి పార్లమెంట్ లో ఈ అంశాన్ని ప్రస్తావించాలని కోరదామని, రాహుల్ గాంధీ గారి సమయం తీసుకోవాల్సిందిగా మా పార్టీ అధ్యక్షుడు మహేష్ కుమార్ గౌడ్ గారికి బాధ్యత అప్పగిస్తున్నామన్నారు.

కులసర్వేలో పొందుపరిచిన బీసీల లెక్క వందశాతం సరైందని, బీసీ బిల్లును పార్లమెంటులో ఆమోదించుకోవాల్సిన బాధ్యత అందరిపై ఉందని, ముఖ్యమంత్రి గుర్తు చేశారు. బీసీలకు 42 శాతం రిజర్వేషన్లు సాధించే వరకు విశ్రమించేది లేదని, కామారెడ్డి ప్రకటనకు మేం కట్టుబడి ఉన్నామని, ముఖ్యమంత్రి రేవంత్ రెడ్డి అన్నారు.