త్వరలో కామారెడ్డికి కేసీఆర్

రానున్న అసెంబ్లీ ఎన్నికల్లో కామారెడ్డి నియోజకవర్గం నుంచి పోటీ చేసేందుకు బీఆరెస్ పార్టీ అధ్యక్షుడు, ముఖ్యమంత్రి కే చంద్రశేఖర్‌రావు సన్నద్ధమవుతున్న తరుణంలో కామారెడ్డిలోని బీఆర్‌ఎస్ క్యాడర్‌లో ఉత్సాహం నెలకొంది. పార్టీ సభ్యులు ఇప్పటికే ప్రచార కార్యక్రమాలు చురుగ్గా ప్రారంభించడానికి సన్నాహాలు ముమ్మరం చేశారు.

కామారెడ్డి నుంచి పోటీ చేయాలన్న ముఖ్యమంత్రి నిర్ణయంతో ఆయన నియోజకవర్గ వ్యవహారాలపై దృష్టి సారించారు. ఆయన ఈ వారం ప్రగతి భవన్‌లో కామారెడ్డి నియోజకవర్గ నాయకులతో కీలక సమావేశాన్ని ఏర్పాటు చేసి, నియోజకవర్గ రాజకీయ , పార్టీ కార్యకలాపాలు,కొనసాగుతున్న అభివృద్ధి కార్యక్రమాలపై చర్చించనున్నారు.

గత కొన్ని వారాలుగా, కామారెడ్డి జిల్లాలో స్థానిక రాజకీయాలు, పార్టీ పురోగతిపై చంద్రశేఖర్ రావు నియోజకవర్గ మరియు మండల స్థాయి నాయకులతో సంప్రదింపులు ప్రారంభించినట్లు తెలిసింది. ఇప్పటికే ప్రభుత్వ వైద్య కళాశాల ఏర్పాటు, మిషన్ భగీరథ పైప్ లైన్ రీప్లేస్ మెంట్ తదితర కార్యక్రమాలకు రూ.197 కోట్లు కేటాయిస్తానని ప్రకటించారు.

అసెంబ్లీ ఎన్నికల అధికారిక షెడ్యూల్‌ ప్రకటించకముందే బీఆర్‌ఎస్ అధ్యక్షుడు తన కొత్త నియోజకవర్గాన్ని ఒక్కసారైనా సందర్శించాలని భావిస్తున్నారు. పార్టీ యంత్రాంగం ఎన్నికల సన్నాహాల్లో పూర్తిగా నిమగ్నమై ఉంది. BRS MLC కల్వకుంట్ల‌ కవిత ముఖ్యమంత్రి ప్రచారం, ఓటర్లతో కనెక్ట్ అయ్యే ప్రయత్నాలకు నాయకత్వం వహిస్తున్నారు. మంత్రి వేముల ప్రశాంత్ రెడ్డి, స్థానిక ఎమ్మెల్యే గంప గోవర్ధన్, ఇతర బీఆర్‌ఎస్ నాయకులు ఎన్నికల ప్రచారంలో చురుగ్గా పాల్గొంటున్నారు.

కామారెడ్డి నుంచి పోటీ చేయాలని చంద్రశేఖర్‌రావు తీసుకున్న నిర్ణయం స్థానిక పార్టీ క్యాడర్‌ను మొదట ఆశ్చర్యానికి గురిచేసినప్పటికీ, అది వారిలో ఉత్సాహాన్ని నింపింది.

మరో వైపు ప్రస్తుత సీఎం నియోజకవర్గమైన గజ్వేల్‌లో ఓటమి భయంతోనే ముఖ్యమంత్రి కామారెడ్డికి మారారని ప్రతిపక్షాలు ఆరోపిస్తున్నాయి.

అయితే, ఈ వాదనలను ఎమ్మెల్సీ కవిత తోసిపుచ్చుతూ, గజ్వేల్‌తో పాటు కామారెడ్డి నుంచి పోటీ చేయాలనేది చంద్రశేఖర్ రావు వ్యూహాత్మక నిర్ణయమని నొక్కి చెప్పారు. ‘‘ఓడిపోతామనే భయం ముఖ్యమంత్రికి ఉందని చెప్పడం హాస్యాస్పదంగా ఉంది. దేశంలో ఏ స్థానంలోనైనా పోటీ చేసి సులభంగా గెలవగల నాయకుడు. తెలంగాణలో అజేయమైన నాయకుడు ఆయన ఒక్కరే” అని ఆమె అన్నారు.