ఇటీవల బీజేపీ నుంచి సస్పెండ్ అయిన గోషామహల్ ఎమ్మెల్యే రాజాసింగ్ ను బీజేపీ ఆ స్థానం నుండి తప్పించాలని తీవ్రంగా ఆలోచిస్తోంది. ఆయనను ఎంపీగా పోటీ చేయించాల
ఇటీవల బీజేపీ నుంచి సస్పెండ్ అయిన గోషామహల్ ఎమ్మెల్యే రాజాసింగ్ ను బీజేపీ ఆ స్థానం నుండి తప్పించాలని తీవ్రంగా ఆలోచిస్తోంది. ఆయనను ఎంపీగా పోటీ చేయించాలని ఆ పార్టీ భావిస్తోంది. జహీరాబాద్ నుండి ఎంపీగా పోటీ చేయాల్సిందిగా ఆయనకు ఇప్పటికే బీజేపీ నాయకత్వం సూచించినట్టు సమాచారం. అయితే ఆయన అందుకు సిద్దపడటం లేదని తెలుస్తోంది.
ఈ సారి మళ్ళీ గోషామహల్ నుంచి పోటీ చేసి గెలిచి హ్యాట్రిక్ సాధించాలని రాజాసింగ్ భావిస్తున్నారు. ఆయన 2014, 2019లో గోషామహల్ నుండి బిజెపి టిక్కెట్‌పై రెండుసార్లు ఎమ్మెల్యే ఎన్నికల్లో పోటీ చేసి గెలిచారు.
అయితే బీజేపీ అగ్రనాయకత్వం మాత్రం ఆ స్థానం నుంచి సీనియర్ నేత ముఖేష్ గౌడ్ కుమారుడు విక్రమ్ గౌడ్ ను బరిలోకి దింపాలని భావిస్తోంది. ముఖేష్ గౌడ్ మహారాజ్‌గంజ్ నియోజకవర్గం, ప్రస్తుతం గోషామహల్ నియోజకవర్గం నుంచి పోటీ చేసి ఎన్నికల్లో విజయం సాధించారు. ఒకప్పుడు తన తండ్రి ప్రాతినిధ్యం వహించిన నియోజకవర్గంలో విక్రమ్‌గౌడ్‌కు పలుకుబడి ఉంది.
కొన్ని పార్టీ సంబంధిత సమస్యల కారణంగా రాజా సింగ్‌ను గోషామహల్ నుండి వేరే నియోజకవర్గానికి తరలించాలని బిజెపి నాయకత్వం కోరుకుంటోంది. వారు అతనికి జహీరాబాద్ ఎంపీ సీటును కూడా ఆఫర్ చేశారని బీజేపీ వర్గాలు వెల్లడించాయి.
జహీరాబాద్ ఎంపీ స్థానానికి పోటీ చేసేందుకు రాజాసింగ్ విముఖత చూపడంతో పాటు గోషామహల్ నియోజకవర్గం నుంచి అసెంబ్లీ ఎన్నికల్లో పోటీ చేయడంపై పట్టుదలగా ఉన్నట్లు సమాచారం.
కాగా, తెలంగాణ మంత్రి హరీష్ రావు, రాజా సింగ్ మధ్య శుక్రవారం జరిగిన భేటీ రాజకీయ వర్గాల్లో చర్చనీయాంశమైంది. తాను బీఆర్‌ఎస్‌ పార్టీలోకి వెళ్లడం లేదని, తాను పార్టీ మారడంపై వచ్చిన పుకార్లకు స్వస్తి పలకాలని ఎమ్మెల్యే స్పష్టం చేశారు. అయినప్పటికీ ఆయనకు బీజేపీ గోషామహల్ టికట్ ఇవ్వకపోతే బీఆరెస్ నుండి పోటీ చేసే అవకాశం లేకపోలేదని టాక్ నడుస్తోంది.
గత ఏడాది అక్టోబర్‌లో మహ్మద్ ప్రవక్తపై అవమానకరమైన వ్యాఖ్యలు చేసిన వివాదంతో బీజేపీ తప్పనిసరి పరిస్థితుల్లో రాజాసింగ్ ను సస్పెండ్ చేయాల్సి వచ్చింది.